بنت لون بشرتها أسمر والعيون متكحلة
والفيونكا ع الضفاير نفس لون المريلة
ابتسامتها جميلة باختصار زى القمر
اسمها كان من أوائل مدرسة بحر البقر
لما كانوا بيسألوها عاوزة تبقى زى مين
كات بتضحك من كسوفها أحلى ضحكة تشوفها عين
يومها كانت راسمة صورة جوة كراسة النشاط
راسمة ورد وشمس طَله فوق زمايلها البنات
وف تحية العلم صوتها أعلى م الولاد
مرة واحدة الضحكة تاهت وسط صوت الطيارات
جوة حوش المدرسة فجأة زاد صوت العياط
القنابل نازلة تقتل. رسم جوة الكراسات
و الفيونكا والضفاير ويا باقى الأمنيات
بنتى صوتها كان بيضحك اتقلب فجأة لسُكات
اللى فاضل منها صورة وَيَا حبة ذكريات
ع الحيطان متعلقة جمب كراسة النشاط
ورقه وقلم - أرشيفية
