هناك الكثيرون وراء الكواليس في الأعمال الدرامية التي نشاهدها في سباق رمضان 2024، تفاصيل عديدة يعيشها فريق العمل داخل اللوكيشن فلكل شخص منهم وظيفته ودوره حتى يخرج المسلسل بشكل لائق للجمهور، سكريبت الملابس من المهن الدقيقة والمهمة في صناعة أي عمل.
وفى يوم المرأة المصرية، نستكشف حكاية أية محمود إحدى بطلات ما وراء كواليس مسلسل المعلم بطولة النجم مصطفى شعبان، وهى فتاة في العشرينيات من عمرها مسئولة عن سكريبت الملابس بالمسلسل.
وقالت أية لـ اليوم السابع: "اشتغلت مسلسلات كتير وببقى دايما مسئولة عن سكريبت الملابس وهو وظيفة مهمة ودقيقة جدًا، واغلب الوقت بتكون الوظيفة خاصة بالسيدات لأننا بنركز أكثر على التفاصيل والملابس والألوان".
وعن تفاصيل وظيفتها قالت: "أنا بستلم الاسكريبت قبل التحضيرات والتصوير وبشتغل على شخصية شخصية وعدد الملابس اللى بتلبسها خلال العمل أو الحلقات اللى معانا ما بين استقبال وبيت وخروج وهكذا، وبنحدد كل واحد شكل لبسه بيكون عامل إزاى، وبكون مسئولة أكتر انى أحافظ على فكرة إن كل واحد خلال العمل الدرامى يكون معاه اللبس بتاعه بالميكب بالشعر في المشهد المخصص ليه".
وأضافت: "رغم إنى اشتغلت حاجات كتيرة ولكن صعوبة مسلسل المعلم إنه فيه شخصيات كتير أوى فلازم أركز على كل شخصية، في مشاهد بتوصل إن بيكون معايا 40 ممثل وكل واحد عنده تفاصيل ملابس وشعر وميكب".
وتابعت: "في بعض الأوقات بيكون معانا نسخة إضافية من الأوت فيت للمثل الواحد ولكن ده بيعتمد على بعض المشاهد مش كلها فيه مشاهد بتكون أكشن مثلاً فالممثل هيضرب أو هيقع على الأرض فلازم نأمن نفسنا بأوت فيت تانى".
وأنهت حديثها: "أجواء التصوير في مسلسل المعلم مختلفة وجميلة، أنا دايمًا بقول إنى محظوظة بعلاقتى بالممثلين، كلهم متعاونين ولما بطلب منهم حاجة في شغلى متعاونين جدًا معايا بداية من أستاذ مصطفى شعبان".
