عرضت الفنانة هيدي كرم، مشكلة إحدى الزوجات متزوجة منذ 25 سنة داخل بيت عائلة، قائلة: "الزوجة بتقول كانت بتنزل وتقعد مع أهل جوزها ولكن مش كل يوم، وحماتي مش عاجبها الوضع، وحصلت مشاكل كتير وجوزها بيشوف إنها غلطانة ومش قادر يقولها حاجة، وبيصدقها هي وغضبت وقعدت عن بيت أهلي، وحماتي ماعجبهاش وكانت بتصوت وتقع في الأرض ولو حصلت مشكلة تشتم فيا كتير، وجوزي مش ببيقولها حاجة وديما شايفها طيبة وأنا شريرة، وديما فيه مشاكل مع جوزي".
ونصحت الفنانة هيدي كرم، في برنامج "راجل و2 ستات" المذاع عبر قناة ON، الزوجة بضرورة تجاهل كافة هذه الأمور، قائلة: "لازم تكبري دماغك ولو جوزك مامته عاملة إزاي ومش قادر ياخد موقف.. دي أمه، وانتي لازم تسايسي أمورك، وليه صدامية وتقعدي تتكلمي معاها ند بند، وانتي حاطه نفسك في مكان هتخسري فيه كتير".
وقالت الإعلامية شريهان ابو الحسن: "ليه تباني إنك متجبرة ومتكبرة وشريرة بشروطك، قوليلها أيوة يا ماما وانزلى واطلعي بسرعة، قوليلها أيوه يا ماما يا حبيبتي جاية".
وقالت الفنانة نهال عنبر: "هي دي لمة العيلة كل يوم، والكل بياكل مع بعضه، موجودة النهاردة ومش موجودة بكرة، ولازم تسايسي أمورك".
